-नाम्सादिम संवाददाता-काभ्रेपलाञ्चोक । जिल्लाको कोशीपारी क्षेत्रमा पर्ने भुम्लु गाउँपालिकाको दुई ओटा वडाका करिब एक हजार परिवार ४३ वर्षदेखि लालपूर्जाविहीन अवस्थामा छन् । विसं २०३२ मा नापीका बेला साविक पिपलटार गाविसमा रहेको खेतीयोग्य जमीनबारे विवादपछि भएपछि टुक्रिएर भुम्लुटार र फलाँटे गाविस हुँदा स्थानीय बासिन्दा लालपूर्जाविहीन बन्न पुगेका थिए ।

गाउँपालिकाको वडा नं – ७, फलाँटेका ३६५ र वडा नं – ८, भुम्लुटारका ५८९ पीडित परिवारसँग ४३ वर्षदेखि आफ्नो जमीनको लालपूर्जा नभएको वडा नं ८ का वडाध्यक्ष मोतिलाल तामाङले बताए । उनका अनुसार लालपूर्जाविहीन भूकम्पपीडितलाई भूकम्प गएको दुई वर्षपछि मात्रै सरकारी राहत अनुदान उपलब्ध गराइएको हो ।

तामाङले भने, ‘दुई वर्षपछि सरकारी आवास निर्माण राहत अनुदान उपलब्ध गराइएपछि यहाँका भूकम्पपीडितले घर बानाउन थालेका हुन् ।’ अन्तर वडा सीमा विवाद मिलाउन तथा जग्गाको लालपूर्जा प्राप्तिका लागि वडाध्यक्ष तामाङको संयोजकत्वमा गत साता समिति गठन गरिएको छ ।

गत साता भुम्लु पुगेका सञ्चार तथा सूचना प्रविधि मन्त्री गोकुलप्रसाद बास्कोटासँग स्थानीयवासीले जग्गाको लालपूर्जाको समस्या सुल्झाउन आग्रह गर्दा उनले ‘उच्चस्तरीय भूमि व्यवस्थापन आयोग’ निर्माणपछि समाधान हुने आश्वासन दिए ।

हाल गाउँपालिकाको वडा नं ७ र ८ मा २५० घर निर्माणाधीन अवस्थामा छन् । जग्गाधनीले जमीन कर ‘तिरो’ तिरेको तथा अनुगमनकर्ता इञ्जीनियरले दिएको निस्साका आधारमा गत वर्षको कात्तिकमा सरकारले आवास निर्माण अनुदान उपलब्ध गराएको हो । यसअघि लालपूर्जाविहीन भूकम्पपीडितले अनुदान सम्झौता गर्न पाएका थिएनन् ।

सरकारले लालपूर्जाविहीन पीडितको समस्यालाई मध्यनजर गर्दै गत भदौमा आवास निर्माणसम्बन्धी कार्यविधि तयार गरेपछि यहाँका करीब एक हजार लालपूर्जाविहीन पीडितले किस्ताबन्दीमा सरकारी अनुदान लिएर घर बनाउन पाएका हुन् । हाल वडा नं ७ मा ५० तथा वडा नं ८ मा ३५ घर बनिसकेका छन् ।

गाउँपालिकाका अध्यक्ष गुमानध्वज कुँवरले लाभग्राहीको सूचीमा ६७ परिवार छुटेको जानकारी दिए । उनले ३८ पीडितको बस्ती जोखिमपूर्ण अवस्थामा रहेकाले गाउँपालिकाभित्रै अन्यत्र स्थानको खोजी कार्य भइरहेको बताए ।

पटक-पटक सरकार फेरिए, व्यवस्था फेरियो । लालपूर्जाको आश्वासनले पन्चायतदेखि संघीय लोकतान्त्रिक गणतन्त्रसम्म पार गरिसक्यो । केही जनताले लालपूर्जको अनुहार नदेख्दै संसार छाडे, केही निरास छन् । नयाँ पिँढी आशावादी छ । भुम्लु गाउँपालिकाको अमुल्य मतको सहयोगले मन्त्री बनेका गोकुलप्रसाद बास्कोटाको वचन आश्वासनमा मात्रै सीमित नहोस्, सार्थक होस् ।

Comments

comments

SHARE