-धर्मचन्द्र याेञ्जन तामाङ

रेडियोकर्मी तथा पत्रकार हिरामान बल तामाङले रेडियो नमोबुद्ध १०६.७ मेगाहर्ज धुलिखेल र सिन्धु एफएम १०५ मेगाहर्ज सिन्धुपाल्चाेकबाट उत्पादन तथा प्रशारण गर्नुभएको रेडियो कार्यक्रम नाम्सादिमको छापा स्वरूपमा तयार पारिएको पुस्तक नाम्सादिम माल्दिभ्समा वितरण गरिएको छ ।

नेपाल तामाङ समाज माल्दिभ्सले एक कार्यक्रमका बीच उक्त पुस्तक बितरण गरेको हो । २ वर्ष अघि ल्होछारको अवसरमा भएको ३ दिने ल्होछार ज्ञान महोत्सव कार्यक्रम उद्घाटन गर्ने क्रममा तत्कालीन शिक्षा मन्त्री गिरीराजमणि पोखरेलले विमोचन गर्नुभएको बलको नाम्सादिम पुस्तकको माग भइरहेको बताउँदै नेपाल तामाङ समाज माल्दिभ्सका अध्यक्ष तिर्थ बोम्जन तामाङले केही प्रति पुस्तक बितरण गरिएको जानकारी गराएका छन् ।

तामाङ जातिका संस्कार संस्कृति, ज्ञान र सिप लोप हुन लागेको अबस्थामा पत्रकार बल तामाङले गाउँ-गाउँका कुना-कन्दराहरूमा रहेका दुर-दराजका गाउँ, टोल र बस्तीहरूमा पुगेर तयार गर्नुभएको तामाङ भाषाको लोकप्रिय रेडियो कार्यक्रम नेपाली भाषामा अनुवाद गरी प्रकाशन गरिएको नाम्सादिम निकै ज्ञानवर्द्धक रहेको बम्जनले बताए । अहिले साउदी अरेविया, कतार, मलेसिया, र संयुत राज्य अमेरिका लगायतका देशहरूमा नाम्सादिमको माग बढिरहेको छ ।

हिजोका दिनमा रेडियो कार्यक्रमको रूपमा रेडियोमा घन्कने नाम्सादिम तामाङ भाषा, लिपि, कला, संस्कृति र धर्मको संरक्षण, सम्बर्द्धन एवम् विकास गर्दै तामाङ समुदायको आर्थिक, सामाजिक र शैक्षिक स्तरोन्नति गराइ सभ्य समाज निर्माण गर्ने उद्येश्यका साथ नाम्सादिम छोरङान नेपाल नामक सामाजिक संस्थाको रुपमा हामीमाझ उपस्थित भएको छ ।

सोही नाम्सादिन छोरङान नेपाल नामक सामाजिक संस्थाले प्रकाशन गरेको नाम्सादिमको छापा स्वरूप माल्दिभ्समा बितरण गर्न सहयोगीको भुमिका निर्वाह गर्नुहुने चाहना ब्लाेन तामाङ, नेपाल तामाङ समाज माल्दिभ्स र बितरण गर्नुहुने तिर्थ बोम्जन तामाङलाई धन्यवाद दिदैँ पुस्तकबाट अएको सम्पुर्ण रकम नाम्सादिम कार्यक्रम उत्पादन, प्रशासरण एवं प्रकाशनमा खर्च गरिने बल तामाङले बताए ।

SHARE