–शंख बहादुर तामाङ थिङ
धुलिखेल
गेताङ स्हेङ्खेन ज्यो ज्योदा ल्हास्सो फ्याफुल्ला !
उइमा दाङबो काल्बो ह्यान्देन ल्हो ल्हो पहिचानरी फ्युक्पो मुबा ह्याङ ह्युल्बा तामाङ राज्यला ल्हामान थोरी लिच्छा मूला ।
चू नाम्सा दिम गेताङ गोर्की दोखाङ हिन्ना लोबोन कादेला लागिरी गोर्की लोप्खाङ हिन्ना सदियौँ ह्यान्दे पहिचानसे थलिएप तासी खाबा विरामी रोगी, रोङ रोङ तासी खबा कादेला लागिरी मान्खाङ हिन्ना ! नाम्सा दिम गेताङ प्रयोगात्मक रुपरी नाम्सा नाम्सारी निसी तामाङ ह्यूल्बाला थोपथाङ ला ताम थिबान हाबा लाबा म्राङजि ओम तामाङला सुख दुःखरी साथ पिन्बान हाबा नोन म्राङजि तामाङला रुङबा बस्ती मुबा तेमाल ह्यान्दे म्हाबारगाङ शैलुङ गाङ दोनाला नाम्दार कादे ओम हरेक दोङह्राप थेन परिवर्तनला काइकादे ठाम्बान लाबा म्राङजि शिक्षा, स्वास्थ्य, बन तातावरण ओम सामाजिक थेन नैतिक चेतनाला वृहत फराकिलो गोङबा थिसी म्राबान लाबा नाम्सादिमला निरन्तरता अपरिहार्य मुला ! थेसे लामा तिनी चू गेताङरी ङा ऐ नोन तिलै सेम ताम थान्बा सेम ताबासे लासी ङा ऐ नोन गोर्की जाबा चिट्ठीपत्र पूगापा मूला गेताङ स्हेङखेनसे गेताङरी समाबेश लासी पिन्सी स्ह्युसम ल्हामान ल्हामान सेम ताङसेला मुला । लिच्छाला रेरी नोन चु गेताङ निरन्तर तासी निगै छर्कै ल्हेकै छेरेङ्गै !

तिरेम केसी सिनोन तोबा चु म्ही ल्हुई चु झम्पुलिङला ङ्हीरेला डोन्बो ह्राङबा चेख्खेन हिन्बा टिम ! थेनोन दुङाल बज्र्याला खोेर्लो न्हाङरीन मिति २०२४ साल माघ ला ला १५ गते कुनु काभ्रे जोङला भिमखोरी गा.वि.स वडा न.८ ला भोटेसालु बिबा तामाङ नाम्सारी ङाई केवा किन्बाला टिम ! ल्हामान म्हिनी कादेसे पाङबा लाबान मुला संघर्षशील ह्याङला चु म्ही ल्हुइला गोङमा न्हाङरी अनेकौँ ग्यार्जा तोङजा दुङाल बज्र्या खमुला रो ! खाइमाम जिन्दगीरी खान क्रेतोबा टिम खाइमाम चु जिन्दगीरी ग्यूरो ब्रतोबा टिम ! चु ङाला जिन्दगीला गोङमारी नोन खान ब्रनाब्रनान तिनी बिमा न्हाङगर बिमाम छार्सी ग्रेन तासी ब्योन ग्रेन दोजिम ! सायद २०४५ सालरी क्यार मुला तला थे दुइरी ङाला सेम डिक्पा, तोयाङ नाम्साला शान्ति बिबा ह्रो मुबा । शान्ति थेन ङा औदिन सेम डिक्पा ह्रो मुबा । ङा थेन थे चासै छयामनोन भ्रासैनोन छयामनोन ताबा मुबा । शान्ति जजागी फ्यूक्पोला जामे मुबा बिसाम ङा प्राङबोला कोला मुबा । थे दुइरी प्राङबो थेन फ्यूक्पो गुङरी ल्हामान लेबाफेबा मुबा । तर ङाला जिन्दगीला ग्यालमरी खबा दुङाल बज्र्यारी शान्तिसे औदिन ह्रो लाबा मुबा । बिसाम ङाइ ऐ नोन शान्तिदा मोक्कोन गोङमारी क्यार साथ सहयोग पिन्बान खाबा मुबा । ङानी प्राङबो गरीब ताबासे स्हयो ङ्यासे छाक योना लाबारी क्वान्बारी चाबारी नोन ल्हानन दुङाल ताबासे ङाला शान्तिसे ङादा ल्हानान ह्रो लाबा मुबा । थेला छ्यामरी थेसे ङादा कोलेसे कोलेसे माया लाबारी चुजिम बिसाम ङाइमी झन थेदा सेमतिङ न्हाङ ह्यान्देन औदिन माया लाबा मुबा । थे बिना ङा सोआखाम्बा ओम ङा बिना थे एनोन सोआखाम्बा दुइ तासी जिन्बा मुबा । झन झन शान्तिसे ङादा ल्हामान माया लाबान खाजी छ्यामरी ङा ऐ नोन ल्हामान ल्हामान माया पिन्बान खाजी शान्तिदा ओम ङाला सेमला तिङन्हाङला ताम म्हि ल्हुइला ताम ङाइ शान्तिदा पाङबान खाजी । ङा फोइतान तामा धुइरी शान्तिसे ह्राङलान धिम ग्याम्से चाबा स्हे भासी ङादा ख्वाबा मुबा, चुनोन ङादा लाबा मायाला ग्रेन चिनो मुबा । तिनी न्हाङगर बिना बिनान दिन दुइ बिताप ताबान खाजी, सायद ठ्याक्कन २०४६ सालला मङसीर लाला ६ गते रे कुनुला ताम मुलातला । जहिलेन ह्राङलासी शान्ति थेन ङा ल्हुइला तामकादे पाङसी चिबान मुबा । सेम न्हाङला ताम कादे गिसेम गिदा बो लाबान मुबा । थे दुइरी अज्याबा ग्रेन दुङाल बज्र्या खलाङसे खलाङसे लाबा लुङसुर खाजी थे लाबा लुङसुरसे लासी ङा ल्हामान ल्हामान लोङजीम ! ओम थे बेलारी हाबा लाबा लुङसुर ल्हामान ग्रेन मुबासे लामा क्यारमर तिकै आम्राङनी थेन बेलारी ङाला सेमला ह्रो मायाला झो तिङला टुक्रा शान्तिदा फेट टाङ्सी खै हानाङ बोर्जी हानाङ ! ङा खैमा क्याम्साङ खैमा जासम म्योबा ह्राङ तसी क्रिङसी क्रासी भ्राजी ल्हामान क्रिङसी क्रसी म्हाइसी ङाइ शान्ति शान्ति बिसी ङ्ह्योइजी, क्रिङजी, क्रिजी तर ङाला सेमला ग्लेस्या शान्ति खै खलाङ दोजी खलाङ दोसी ल्हामान ग्याम ख्रुङसाइ ङाला शान्ति फ्लिक दोसी अखाजी ! ङाला क्रिङबाला क्रिबाला काइ न्हाङरी धर्ती आमानोन मिख्लीला धारा पुइबान क्राजी ओम ङा एनोन ल्हामान ग्लारी न्हा शान्तिदा स्याप्ला वा बिसी म्हाइसी भ्राजी ! थे थाहा अरेबा ग्यालामरी भ्राना भ्रानान हानाङ दोजी हानाङ ङादान थाहा आतानी ओम ङै कुन्ज्योसोम साङगेदा भाङ ह्रिजी हे साङगे कुन्ज्योसोम ङाला शान्तिदा धोसी भाउ भिसी ङा ल्हामान क्रिङजी तर साङगेसे ङाला चू तामदा आथेनी रोशी स्योङ, सुनकोशी गन्धी बगप ताबा ह्राङ ङाला ल्हुइला गोङमा कादेनोन ल्हेबान निजी ! कोर्ना कोर्नान जिन्दगीला ग्यालमरी रोशीस्योङ कुनिला बगररी क्यार छ्योङबान भ्राजी, रोशी ला क्यूइ थुङबान भ्राजी थेन दुइरी ङा बेहोस ताजीम ! बेहोस ताबा दुइन्हाङरी ङाइ चू ह्युल्ला मिख्ली फ्यासी क्राबान लाबा शान्तिदा म्राङजी ! ङाला सेमतिङला शान्ति ह्राङनोन चू ह्यूल्ला शान्तिदा नोन लाबा लुङसुरसे फेट टाङसि बोर्बा म्राङजी ! चु ह्यूल्ला शान्ति आस्याप्ना ल्हामान नेपाली म्ही ल्हुइ मिख्ली फ्यासी क्राबान भ्राबा म्राङजी ! शान्तिदा केवा पिन्बा धर्ती आमानोन मिख्ली फ्रुल ताइना लाबान क्राबा म्राङजी ! चू ह्यूलरी शान्ति आरेबा टिम ! आज्यावा पापी म्हिह्राङबा लाबा लुङसुरसे लासी दुनियाँ बेनान क्रातोजी, बेनासेन मिख्ली फ्यातोजी । ङाला तिङजो शान्ति ङाइ ऐदा ह्रुप ता आम्याङना सायद ङाइ चु ह्यूल ख्लासी भ्रातोला ताला । शान्ति चु ह्राङबा दात्तेला लिच्छला अवस्थारी ताम पाङगो ह्या ? ल्हामान ल्हामान रे लिच्छ ङाला शान्तिसे ताम पाङबा ह्राङ छोर्जी । खलाङ खलाङ शान्तिला काइकादे अस्पष्ट थेजी ! मु न्हाङ ग्याम्से काइ खाबा ह्राङ छोर्जी । ओतासी ङाला शान्तिसे पाङजी खलाङ खलाङ ग्याम्से लोप्साङ, ऐ दत्तेन सिबारी आता ऐसे दत्तेन चु ल्हुइ ओम चु ह्युल ख्लासी अनिउ ह्याङला चू धर्ती मातासे मूक्ति याङबान आरे ! बेनानलान लागिरी ज्याबा गे लाउ, ज्यो ज्यो आले गुङरी छेसी साइसी आहिन डिक्सी ल्होसी ङ्हाच्छ भ्राउ अवस्यन ङा ऐदा ह्रप ताबारी खला, सदाला लागिरी एदा माया पिन्बारी ओम छ्याम चिबारी खाला ह्या ? ङाला शान्तिसे पाङबा ह्राङ ह्याङ मेक्कोन ज्यो ज्यो आले नाना आङा डिक्सी ङ्हाच्छ भ्राजी बिसाम चू ह्ूलरी शान्ति खसेला मुला ।
SHARE