प्रजातन्त्र, लोकतन्त्र,
बजि गणतन्त्र
तजि ल्हानान् तन्त्र।।
ह्याङला ह्युलरि
याङताम थोपताङ च्योः लबरी
ल्हामन तन्त्रकते बसैनोन्
अनुप्जि लेबा फेबाला टाः
अान्हाङजि अथुम्जि
नाङबा प्लेबा लबा डे
थेनोन् लेबा फेबा
नाङबा प्लेबा लबला
न्हाङरिन तजि
दङ्पाे ह्रान्ते तामाङ

ग्ले पाेजि
लाेन्वाे पाेजि
ग्यल्ठिम पाेजि
ह्युल्ठिम पाेजि
सक्नाेन पाेसै
तामाङला ह्रिक्पा अपाेजि ।

थे तसि तामाङ
रेरिन लिच्छा तजि
स्हान्नान तामरि स्यजि
म्हिसे डाग्रे स्हाेजि
दाेई नाजि
ह्राङ ह्राङनोन् छेःजि
ङ्हान्बाता ताम याङजि
तामाङ अथाङजि
गाेसै अगोबा दाेःजि
तामाङ छेःबा म्राङसि
स्ह्यान्दाे म्हि ने:टिजि ।।

पप्पाला फिरी न्हेप्पा
नाङबा ह्राङ लजि
सेमला च्युप्पा मि
ब्वाक् ठ्वाङसी
छोर्को दरेम ह्याङ तामाङ
ख्लाको ङ्हान्बाला ताम ङ्यान्पा
ख्लाकाे म्हिला ल्हाम्जा पुइबा
ख्लाकाे ह्राङह्राङनोन् न्हाङरि छे:बा
ख्लाकाे जि आइरक साेल्बा
बाङ्पा छे:बा लबा अङ्हिन्
थाः ताेजि ग्रह खार्कु
ख्लाताेजि ल्हुर्इ
ब्याङताेजि डे
तप्ताेजि ग्येग

दरेम तामाङसे
याङताम थोपताङ म्हैके
ह्याङला ङाेसेःबा ताम्सालिङ
बाबारि ह्याङल्होसि ढिक्सि ब्रतोजि
दरेम छेम्हिङ लताेसै
ङ्हाच्छा वाङताेजि
तिङ ह्रान्तेला बाङ तेःताेजि
म्हेम्हे ह्रान्तेला
काःतेन टुःला साई म्हैताेजि

रेणुका गाेले तामाङ (छाली)
केवासाः तेमाल ५ गाेर्पा , काभ्रे
ग्ये=थाङ्कु ब्रिबा
दत्ते =ग्यनाक दलिङह

शब्दार्थ
ल्हाम्जा=झाेला
डे-ग्येग=म्हाङ राक्षस
छेम्हिङ = युद्ध

Comments

comments

SHARE